SERA

KUNA usemi usemao kuwa utasoma sana, utasahau sana na utajua machache (the more you learn, the more you forget and less yo know)

Katika harakati za kulaza chama cha Demokrasia, CHADEMA kumejikita katika kusaka wafuasi na viongozi kutoka katika vyuo vikuu. Wenyewe wakiwa na imani kubwa kwamba wasomi wataweza kukivusha chama vizuri hatimaye kushika dola.

Kwa  bahati mbaya CHADEMA wamekosa ufahamu kuwa wasomi ni makarani kwa kiasi kikubwa. Wasomi sio wanasiasa bali ni watendaji wazuri wa ofisini. Na kauli hii inathibitisha na mwenendo mzima wa kisiasa wa CHADEMA.

Pamoja na kuwa wamepata mafanikio makubwa kukonga nyoyo za vijana wa vyuo vikuu, lakini mikiki mikiki ya kisiasa bado inawapa shida kubwa.

Siasa inahitaji watu makini na wenye vichwa vilivyotulia sio watu wa kucharuka haraka. Na kwa msingi huo basi uongozi mzima wa CHADEMA umeshindwa kuweka hadharani sera yao hasa ni ipi na ilani yao inasimama kitu gani, badala yake wanachukua muda mwingi kuzungumzia ufisadi. Na kuchukulia ufisadi kuwa sera halisi ya chama.

Katika kipindi hicho hicho cha matengenezo ya ufisadi, CHADEMA watakaouchukua katika kudhibiti ufisadi. Kwa hiyo chama hiki walipaswa kumueleza umati wa Watanzania mbinu zilizo wazi ambazo wao katika utekelezaji wao watafanikiwa kuzuia ufisadi, vinginevyo watakuwa wababaishaji tu ambao siasa zao zimejaa ulaghai.

Nasema ulaghai kwa sababu pamoja na kuwa chama kimesheheni watu wenye digrii moja hadi wengine wamesahau idadi ya digrii walizosomea, wameshindwa kutofautisha kauli mbiu na ilani ya chama ambayo hufafanuliwa katika sera.

Kauli mbinu zimejaa mpaka hawajui ipi itumike kwa kipindi gani. Walikuwa na operesheni sangara hatujakaa vizuri tukaambiwa maisha magumu mara ukaibuka ufisadi tena maandamano mpaka kieleweke.

Hali haijatulia M4C. mikakati yote hii haiendi mbali kwa sababu haina Baraka katika sera na ilani ya chama.

Leo ukiwauliza wabunge wao ni kwa kiasi gani wametafsiri sera rasmi ya chama chao sina uhakika iwapo watatoa jawabu moja lenye kufanana kwa mujibu wa sera ya CHADEMA.

Au katika majimbo walikochaguliwa ni kwa kiasi gani wabunge wametekeleza sera za chama chao kulingana na ilani ya chama chao.

Wabunge na viongozi wa CHADEMA sio wa kweli na pia sio waaminifu hata kidogo kwa sababu katika mahubiri yao mengi wakiwa peke yao na wafuasi wao, huwadanganya na kuwapotosha wafuasi wao eti serikali haijafanya lolote la maana kwa miaka yote hamsini tangu ilipoanza kutawala.

Lakini viongozi hao hao wanapokutana na kiongozi mkuu wa serikali Mhe. Jakaya Mrisho Kikwete hupiga makofi mpaka idadi yake huwapotea. Baada ya kushangilia kwa makofi na vigelegele, hufuatia mapambio ya kumsifu Mhe. Rais wetu Kikwete kuwa anastahili pongezi na kuungwa mkono katika juhudi zake za kujenga uchumi wan chi kwa kuimarisha mawasiliano kila mahali.

Mambo mengine ya mapambio nimeyafahamu. Mfano hai ni pale Mhe. Rais Jakaya Mrisho Kikwete alipokuwa ziarani Rombo na kule Hai. Mbunge wa Rombo Mhe. Selasini (CHADEMA) alimwaga pongezi lukuki kwa Rais.

Baadaye kule Hai kwa Mhe. Mbowe Waziri Mkuu kivuli na Mwenyekiti wa CHADEMA yeye tena katika mapambio yake hayasemeki na haikutarajiwa maneno yale yatoke kinywani mwa Mbowe. Lakini ndio hivyo ameyasema na watu tumeyasikia.

Swali la kujiuliza kumbe uongozi wa CHADEMA mnajua mazuri ya serikali ya Jakaya Mrisho Kikwete kwanini hawawaelimishi wafuasi wao hali halisi ya kisiasa kwa upande wa serikali na wao CHADEMA wanatofautiana nini au kwa upande upi na serikali?

Haya hayasemeki kumbe siasa za CHADEMA ni za woga. Wakiwa peke yao wamesema mengine wakikutana na hao wenye serikali yao wanasifu mengi.

Kimsingi uongozi wa chama hiki wote wana ndimi mbili. Hazijulikana ni ulimi upi husema lililo la kweli na ulimi upi na upande gani husema yaliyo na uongo.

Babu yangu alinisimulia hadithi wakati huo wa kukaa na kucheka na babu kwamba nyani akiwa porini na wanyama wenziwe basi nyani husimama kwa miguu miwili na kuwakoga wanyama wenzake kwamba yeye ni binadamu.

Lakini, atakapo tokea binadamu wa kweli nyani hurudia unyama wake na kutembea kwa miguu na mikono. Kwa kufanya hivyo wanyama wenzake humdhihaki kuwa nyani sio lolote wala chochote kumbe mwoga kuliko kunguru.

Hivyo, uogozi wa CHADEMA mbele ya viongozi wa serikali na CCM huwa wadogo wakiamini na kutii kama wafanyavyo raia wengine na kuthibitisha kuwa wao ni viongozi bandia.

Rais Kikwete alisema kuwa yeye ndio Rais wa Tanzania na nao CHADEMA hawana Rais mwingeni na hawana kwa kwenda isipokuwa kwake. Kweli leo CHADEMA wale wale waliosema mpaka kieleweke na wataandamana bila ya kikomo, sasa wanamuimbia mapambio Rais Kikwete.

Kwanini CHADEMA wanashindwa kutunga na kujenga hoja kupitia sera za chama chao. Kwa sababu wamejaza ‘madeski ofisa’ sio wanasiasa hivyo hoja za kisiasa CHADEMA zinakosa majibu yaliyo sahihi.

Ukosefu wa sera kwa chama kupelekea mapungufu yanayopatikana. Kwa kukosa sera CHADEMA wanakosa majibu kwa serikali juu ya matatizo mbalimbali yanayojitokeza hapa nchini.

Ukifuatilia kwa karibu hoja za CHADEMA zote zimejaa lawama na malalamiko bila ya kutoa jawabu mbadala la mtatuzi wa matatizo yanayojitokeza. Wamejikita kwenye itikadi za uliberali lakini kilichowazi ni kwamba huko wamefuata masilahi tu.

Wao CHADEMA walijua fika kwamba ukijichanganya katika makundi utafanikiwa kupata misaada kutoka nje na kufanikisha mambo yako. Lakini, kinyume cha masilahi binafsi kutoka katika jumuiya waliberali hatujawasikia CHADEMA wakiueleza umma wa Watanzania uliberali unataka nini kijamii, kisiasa, kiuchumi na utamaduni.

Nina imani kubwa kabisa hata Dk. Slaa, Marando, Tundu Lissu, Prof. Safari, Prof. Baregu hawajaota iwapo wao wanawajibika kuwafundisha uliberali wana CHADEMA.

Hivi Erasto Tumbo kule Meatu au Baradi wanajua madhara ya uliberali? Je Bw. Singo kule Bomba mbili au Mfaranyeki wanajua sera ya uliberali au Bw. Mnyika Manzese Sinza na Ubungo wanayo taarifa juu ya sera ya uliberali?

Rasilimali maji ugawanyo wake ukoje kiliberali. Sasa utaona hakuna hata kiongozi mmoja ndani ya CHADEMA hata Mwenyekiti wao mwenye dhamana ya kuisimamia sera ilani na katiba anaeizungumzia sera ya uliberali.

Sina uhakika iwapo itikadi ya uliberali imo au imeingizwa katika katiba ya CHADEMA na kama imeingiziwa ni kiasi gani cha uelewa wa wana CHADEMA juu ya sera itikadi ya chama chao.

Vinginevyo ufisadi M4C kugeuzwa sera itikadi ilani itakuwa wamewatapeli wazungu wanaotoa nguvu zoa kwa kuamini zinafanya kazi kumbe huku zinakwenda kushoto kulia.

CHADEMA semeni sera yenu itambulike ili ikosolewe ikibidi. Kauli mbiu sio sera. Jibuni hoja za kisiasa kwa sera za chama chenu ili mwelekeo na matarajio yenu yawe wazi.

Kumbukeni usemi njia ya mwongo ni fupi kwa kukosa sera hata mkibahatisha kuingia Ikulu mtaingia mlango wa mbele mtatokea mlango wa nyuma papo hapo.

ends