Lema: Serikali haitambui maji ni biashara

 

MBUNGE wa Arusha Mjini, Godlbes Lema (CHADEMA) amesema licha ya kuwa maji ni uhai, lakini serikali haijatambua kuwa maji ni biashara.

Mbali na hilo, amesema asilimia 70 ya wakazi wa mji wa Arusha wanakabiliwa na ukosefu wa maji  safi na salama, jambo linalosababisha wakazi hao kuishi katika mazingira ambayo si salama kutokana na serikali kushindwa kutoa kipaumbele katika utekelezaji wa miundombinu ya maji.

Lema alitoa kauli hiyo bungeni jana alipokuwa akiuliza swali la nyongeza kwa kutaka kujua ni lini serikali itahakikisha inapeleka maji katika miji mikubwa pamoja na maeneo mbalimbali.

Katika swali la msingi, mbunge wa Bumbwini, Ramadhani Haji Salehe, alitaka kujua tatizo la maji litapatiwa ufumbuzi lini?

Akijibu swali hilo, Naibu wa Wizara ya Maji, Amos Makala, alisema tatizo la maji nchi bado ni kubwa, lakini serikali inajitahidi kuhakikisha inalitafutia ufumbuzi na kuwafanya wananchi wote wanapata majisafi na salama tena ya uhakika.

Alisema mpaka sasa serikali inaendeleza ujenzi wa usanifu wa miradi ya maji ikiwemo ya kukidhi mahitaji ya lazima kwa sasa na yale yajayo.