Wenje: Waziri kutolewa kafara ufisadi escrow

 
 Dodoma. Pamoja na Waziri Mkuu Mizengo Pinda kueleza kuwa hajakabidhiwa ripoti ya Mdhibiti na Mkaguzi Mkuu wa Hesabu za Serikali (CAG), kuhusu uchotaji wa Dola 200 milioni katika akaunti ya escrow, Bunge limeelezwa kuwa kuna waziri mmoja ambaye anaandaliwa kisaikolojia kwa ajili ya kutolewa kafara.

Mbunge wa Nyamagana, Ezekia Wenje alisema hayo jana wakati akichangia hoja ya mpango wa maendeleo ya Taifa mwaka 2015/16 akisema kuwa mipango mingi inashindikana kutokana na kukithiri ufisadi.

Alitolea mfano wa ripoti ya escrow kwamba wabunge waliomba iundwe tume, Serikali ikakataa ikidai haijapata ripoti bila kueleza itapatikana lini.

“Ripoti ya Takukuru imeisha ili tujadili, lakini taarifa tunazopata leo kwamba kuna naibu waziri mmoja mdogo huko Dar es Salaam anaandaliwa kisaikolojia ili aje atolewe kafara hapa, haki ya mama hii kitu mpaka ing’oe bati,” alisema Wenje.

Wenje pia alipinga kitendo cha Serikali kwenda kuomba misaada nje huku ikiwa na mzigo wa mawaziri kiasi kwamba hadi kuna mawaziri wasio na kazi maalumu akihoji ni jinsi gani Serikali inaweza kupunguza gharama kwa kuwa na mtindo huo.

“Haiwezekani unakwenda kuomba msaada kwa wizara 23, halafu una mawaziri  50. How do we cut down cost (Tutapunguza vipi gharama)? Alihoji Wenje huku akipinga mpango wa maendeleo uliowasilishwa na Serikali kwamba hautekelezeki.

Mbunge wa Kigoma Kusini, David Kafulila akijadili mpango huo, alisema haiwezekani ripoti ya escrow hadi sasa haijawasilishwa ili ijadiliwe wakati kuna ufisadi mkubwa uliofanyika. “Nimezungumza mwaka jana nimezungumza juzi na leo (jana) kwamba haiwezekani watu wachache wazuie kupatikana fedha kutokana na ripoti hiyo.

“Hatujui ripoti itatoka lini na suala liko vipi. Haiwezekani familia tano au 10 zizuie tusipate fedha,” alisema Kafulila.

Hoja za wabunge hao zilikuja baada ya Pinda kulieleza Bunge katika kipindi cha Maswali ya Papo kwa Hapo kuwa hajapokea ripoti ya escrow na kuwa akiipokea ataikabidhi kwa Bunge kama inavyotakiwa.

Pinda alitoa maelezo kuhusu ripoti ya CAG, ambayo ilikuwa kwenye swali la msingi la Mbarouk aliyetaka tamko la Serikali kujua kwa nini wahisani wamegoma kutoa fedha za maendeleo nchini.

Pinda alisema wafadhili mara nyingi wanakuwa na sababu mbalimbali, hilo unalozungumza itakuwa ni kesi iliyotokea safari hii, lakini miaka miwili iliyopita kumekuwa na manung’uniko ya kuchelewa kwa fedha hizo, lakini hili la sasa wanasema wanasubiri waone ripoti ya CAG itolewe na ibainike yaliyomo katika ripoti hiyo na wao kama wataridhika watatoa hizo fedha.

“Mimi nasema inshaallah, yatabainika na ni matumaini yangu watatoa hizo fedha, jambo linalonisononesha ni pale unapokuwa katika uamuzi wake unaoweza kugusa watu watatu, wanne, lakini unafanya uamuzi ambao unakwenda kuathiri jamii ya Watanzania wengi hasa wale wa vijijini.